睇波捱夜唔想肥　3個健康宵夜貼士

歐洲國家盃正式步入大直路「吸睛」戲碼，只是往後賽事開波時間，全部都開3am，作為球迷，相信你已頻頻超市入貨，準備好頂眼瞓睇波三寶：啤酒、薯片及杯麵。但這樣過度放任吃喝，你知道有可能吃出來幾多磅脂肪肥膏嗎？

事實人捱夜睇波唔夠瞓，身體血液循環及消化系統都較差，真的不應再吃高熱量的重味精食物，否則愈吃人只會愈容易脫水，更想喝啤酒汽水之類的飲品，結果愈食愈飲人亦愈容易肥。不信？可先看以下數據：

• 啤酒：飲得兩罐，每罐約110卡路里，約等於1碗白飯的熱量（一碗白飯熱量約220卡路里）。
   
• 薯片：1包25克細薯片，大約攝取150卡路里。
   
• 杯麵：多以小麥粉及棕櫚油（或稱植物油）為成份，香港的杯麵都是油炸的，高脂肪高納，一個杯麵約80克，含納1600毫克，已差不多等如成人每日納懾取量，且有350卡路里。

三更半夜飲兩罐啤酒，食一包細薯片加個杯麵，最低限度已懾取720卡路里，等於兩碗半白飯。在每3,500卡路里等同1磅脂肪的前提下，睇晒整個盃賽幾星期下來，未計對膽固醇、血糖的影響，說最少會吃出2至3磅肥膏，真的不出奇。

當然，我明白捱夜睇波要不吃不喝，幾可說是不可能的任務。但以下稍為健康的提神吃喝貼士，建議不想睇波睇到增磅的你，可以參考：

１. 飲品策略：

啤酒飲用量不應超過健康建議水平，即男士別飲超過500毫升，女士再減半。至於健怡汽水，雖看似健康，但其實亦只是防腐劑+碳酸水飲品，對身體無益處。

真的想飲點東西提神，飲花茶、綠茶、蜜糖水可能更適合，而以梳打水加果汁飲用，更是健康首選。

２. 智選小食：

如只為口痕、頂眼瞓要吃小食，最好放低薯片，改吃天然生果脆片，或甚轉而補充全日飲食缺乏的營養，例如大部分人缺乏的奶製品、乾果或生果，可以買定一些低脂乳酪，或是藍莓、車厘茄、士多啤梨等生果存放在家，有需要時混合作小食。

３. 健康杯麵：

真的肚餓，又貪方便想吃杯麵，宜選分量較細的杯裝粉絲、米粉或生麵，熱量可較一般杯麵熱量減半，其中綠豆製的粉絲熱量更低。